Jarrera itxia berretsi du Osasun Sailak Durangoko hiltegiaren inguruan.
Beste ahalegin bat egingo da eta bestelako aldaketak egiteko aukera aztertuko da, hiltegia zabaldu ahal izateko helburuarekin
Erraldek eta Eusko Jaurlaritzak Durangoko hiltegiaren egoera aztertzeko bilera egin dute gaur Lakuan. Erraldek aurkezturiko proposamenak aztertu dira eta Durangoko hiltegia berriro zabaltzeko argudioak defendatu ditu 15 Udalek osatutako erakundeak. Eusko Jaurlaritzako eraikin nagusian bilera ospatzen zen bitartean, baserritar talde batek konzentrazioa egin du kanpokaldean EHNE-Bizkaiak deituta.
Bilera intentsoa eta hein batean gogorra izan da, Eusko Jaurlaritzako Osasun Sailak sentsibilitate eskasa erakutsi baitu abeltzaintza sektoreak bizi duen egoeraren aurrean. Berez gaizki dagoen sektorea, Bizkaiaren kasuan hilketa zerbitzurik gabe dago une honetan, horrek suposatzen duen kostu gehigarriarekin. EHNE-Bizkaiak ez du ulertzen Osasun Sailaren jarrera horren itxia izatea.
Osasun Sailak planteatzen duen oztopoa hilketa lerroan dago, orain Durangon dagoen U formako lerroa barik lerro zuzena exijitzen baitu ezinbesteko baldintza bezala. Hiltegiaren beraren formagatik, hala ere, ezinezkoa da Osasun Sailak eskatzen duen lerro zuzena martxan ipintzea.
Hori horrela izanik, beste buelta bat eman eta bestelako aldaketak egiteko aukera aztertuko da. Espektatiba faltsurik aireratu gura barik, helburua Durangoko hiltegia berriro zabaltzea da.
